【陳頌文隨筆】目標幫隊波踢返上mid table

【Now Sports】大年初一，先祝大家新年快樂、身體健康！

今年應該係喺英國過第3個新年，同以前唔同嘅係，新年期間都仲係要返學同練波，好彩係因為大部份屋企人都喺英國同住喺附近，所以都有同屋企人食團年飯同開年飯。喺英國，就冇話好似喺香港會周圍去拜年，而新年氣氛當然唔似香港咁。去到市中心同China Town附近，都有啲裝飾同有啲細市集活動，有返少少新年氣氣。

球隊方面，依家準備下半季嘅賽事，我哋球隊之前成績唔太理想，不過又未去到冇希望，所以下半季目標係可以打返上去。球隊經歷兩次教練調動，依家狀況可以話慢慢適應。好嘅係新教練加入後，咁啱都係得啲盃賽賽程，同埋有兩個星期冇比賽，可以畀時間佢同球員互相配合。

另外，新教練都有帶新球員加盟，所以球隊嘅實力有所提升，希望會有好成績。新教練安排我嘅位置仍然係進攻中場同前鋒。我畀自己嘅目標，係踢好每一場，爭取落場機會同埋入球，希望可以幫球隊踢返上mid table！

大學都返咗半季啦，開始適應得七七八八，自己讀嗰科又唔算太忙太難，所以冇話好大壓力。另外，有時喺比賽度會見到一兩個香港人嚟支持，都想借呢個機會同佢哋講返聲多謝。見到有人特登嚟支持，總有少少壓力，驚自己表現得唔好。不過，我會同自己講放鬆心情，同埋專心喺比賽度。

撰文：陳頌文
前港隊代表，先後效力曼城青年隊、史篤城預備組與布力般流浪U21，現效力英乙AFC Fylde。

本欄不定期上載

【專訪】熱度‧港味道 陳頌文：目標踢曼城

2025/05/30 07:52